Market Insight：老恒和貨源歸邊

若然瞓醒見美股狂升，以為港股有運行的，一定失望到極。昨日恒指高開181點後，升幅愈玩愈縮，午後更走樣，最多跌128點，收市跌77點收報22,579點，三月期指日市收報22,532點，較扣除除息因素後的合理值22,500點高水32點。

總理李克強的首份中央工作報告，表示今年GDP增長目標7.5%，幾乎是街外大行預測上限水平，並把環境染污視為中國頭號敵人，要同「污染宣戰」，計劃包括推動太陽能發展，淘汰舊車，實施大氣污染防治行動，以及加強水資源保護和推進重點流域污染治理等。

古勝冇點你2014/03/06

萬里長空

短線市況形勢微妙

今個周末股市形勢都幾微妙，周五晚美國公布二月就業數據，係聯儲局月中議息前最後亦最重要的退市參考，加埋周六中國二月出口數據出籠，一月爆冷升10.6%之後，人人都估二月因為春節關係會放緩，唔想好似去賭場買大細的話，減磅係預期之內。

常言道buy on rumor,sell on fact，昨日中央工作報告無意外驚喜，而兩會前A股無形之手突然唔見咗，昨日滬綜指跌18點報2,053點，亦係港股即市升轉跌的導火線。

港股方面，近排炒到出煙的環保及新能源股，昨日個別發展，比亞迪（01211）及中聚電池（00729）腳軟，跌1.8%及4.3%，反而太陽能相關股份仲可以頂得吓，信義光能（00968）再升2.4%，保利協鑫（03800）升幅相若，卡姆丹克太陽能（00712）升6%、興業太陽能（00750）則升11.8%。

預輸尾注先至好衝

股市愈來愈兩極化，銀行、保險及工業股等實體經濟企業，平到無人吼，另一邊廂，位高勢危兼估值開始見泡沫，但有國策配合的新能源及環保股，貴貴都有基金去搶，加埋馬雲以音樂椅遊戲指揮身份出現，音樂一日未停（正式宣布上市），市場認為網股炒風都唔會咁快完結。

睇番騰訊（00700），○九年七月躋身紅底（100元）股，之後足足花一年零二十六個星期，升至200元，去300元耐些少，用咗兩年零十七個星期，時至一三年五月，之後阿里巴巴上市消息，網股好似食咗類固醇一樣，騰訊每升100元需要的時間亦愈來愈少，花114日去到400元，再用111日去到500元，到600元大關只用咗區區58日，推算落去，話騰訊喺四月見700元。

古勝唔會阻人發達唱反調，但都係嗰句，要預咗尾注輸番出去，同埋自問敢去止蝕至好上車。

半新股老恒和（02226），一月以7.15元上市，超額認購過千倍，亦因為基金向來特別偏愛，擁有品牌的消費類股份，形成股價一直未肯調整，二月中旬開始在9至10.32元之間上落，昨日仲逆市重上10元樓上，反映基金收貨都收得好乾吓，如果想買又未買，似乎可以先放一注落去，免得佢股價好似放紙鳶一樣追唔番。

業績正處高增長期

老恒和主要生產煮食用料酒，並有涉及醋及醬油等廣泛在中菜中採用的調味料。品牌歷史可以追溯近一個世紀，但公司上市前業績並不算標青，一二年盈利低於1億元，上市集資主要用作擴充料酒的生產設施，以及採購釀酒所用大米，以配合提高產能計劃。

老恒和缺點是上市日子有限，但優點是盈利基數低，同熟悉的副食品商好似中國旺旺（00151）、統一（00220）及康師傅（00322）的預期市盈率22至38倍相比，老恒和估值唔貴，街外預測一四年17.7倍，未來兩三年是其增長高峰期，股價作勢破位，若有網股恐懼症，不妨留意吓佢。

古勝