要做個成功嘅事業女性唔容易，上市公司多年來嘅女性董事比例都停滯不前，無論近年點樣大力宣傳，都好似冇乜改善。今年恒指成分股企業嘅女性董事比例只係同上年差唔多，得9.6%，連年年做調查嘅社商賢匯都話，「結果令人失望」。
《渣打2014年度香港企業女性董事概況》提到，恒指成分股入面，今年以恒生銀行（00011）嘅女性董事比例最高，達到28.6%；第二位係由上年第十名大躍進嘅港鐵（00066），女性董事佔26.7%；上年第四名嘅滙控（00005）今年排行第三，女性董事佔23.5%。不過，上年榜首嘅建行（00939）今年跌出十大。
欣慰嘅係，恒生綜合指數企業入面都有啲令人振奮嘅數字。英皇鐘錶珠寶（00887）有57.1%女性董事，係唯一一家女性董事過半數嘅公司，第二位有莎莎（00178）同寶龍地產（01238），兩間佔比都係44.4%。
計絲絲話，男女比例平均嘅董事局，各自發揮長處，咁樣對女性又公平啲，又有益公司。今年都係嗰句，絲絲呼籲企業未來一年委任最少一位女性做董事。
余絲韻