絲絲講場：信誠搶iBond水塘唔放過
政府開咗口會推第四期iBond（通脹掛鈎債券），呢項被譽為「中產福利」嘅產品，好受歡迎，次次都大幅超額，有份銷售嘅證券行都當大Project做，勁推優惠，無非想吸多啲新客。信誠證券董事總經理劉昇昂（劉老闆）講明要搶客，激勵同事要加倍努力，唔單止要「洗樓」，仲要「洗邨」兼「洗埋水塘」咁吸客，目標做夠萬五個iBond客，比上年多五成！
笑言Top sales守城門
劉老闆呢個指標，係喺佢哋嘅春茗度發表嘅，員工聽完之後唔知仲食唔食得落呢？
為咗實現iBond客增長五成嘅目標，佢仲即席同上年獲得最高銷售獎嘅經紀，展開一段風趣幽默嘅對答，笑言成個荃灣交晒畀佢，總之由每朝早五點起，凡去城門水塘嘅人，都搵佢哋開戶口，開工開到夜晚冇人上去為止。
劉老闆嫌百億太少
劉老闆話，歡迎政府再發行iBond，但失望嘅係發行額只維持100億元，唔知夠唔夠大家分。上年信誠推出100%孖展、零息、零按金認購iBond，並設104蚊回收價，吸引唔少新客過檔幫襯。
春茗聯歡晚會當晚34圍座無虛席，抽獎、遊戲、嘉賓獻唱等掀起多個高潮，公司員工同客戶齊齊度過一個愉快難忘嘅晚上。
余絲韻