Market Insight：暫難脫上落市格局

不過，內地股市方面，滬綜指自一月中見1,984點之後，近兩個月低位逐漸上移，似乎開始在2,000至2,020點之間搵到支持。加埋上周五人民幣匯價急插見6.17之後，兩會一開波跌勢即刻定番晒落嚟，如果烏克蘭局勢無乜大變動，短期港股上落市格局不變，22,400至23,200點之間玩回力球機會較大。

近期股市，等機會買貨的資金其實唔少，但見滙豐中國二月份製造業PMI已經跌穿50盛衰分界線，民企及中小企生意仲被冷風吹住，實體經濟麻麻，形成股市內有增長故事配合的選擇其實十分有限，搞到來來去去都係網絡、手遊、醫藥、環保及可再生能源股。

古勝冇點你2014/03/05

萬里長空

天價收購頻頻出現

當一間公司股票價值遠高於每股帳面值，股份溢價又不知可以持續多久，對股東最有利當然係印公仔紙，四圍收購其他資產。舊年古勝已經講過，今年係馬雲及馬化騰的「雙馬年」，兩間公司市值合計（阿里巴巴是投行的估值）足足是過萬億市值的建行（00939）近兩倍的時候，唔理好醜，買咗至算策略絕對正確，最緊要普羅投資者願意付出70倍PE去買，一個願打一個願捱。

雲遊控股（00484）宣布以7,000萬美元，入股港台人氣遊戲「神魔之塔」開發商Magic Feature 21%股權，出價相當於MF整體價值達27.3億港元。先唔講遊戲的原創性被受玩家質疑，話熟口熟面，「參考」另一日本熱門手遊PAD。去年MF資產不足1億元，除稅後核心經營溢利3,859萬元，計落往績PE是71.8倍天價。

MF目標今年賺8,000萬美元或者6.24億港元，相當於15.4倍增長！如果成真，計落收購PE會降至4.3倍，尚算合理。

手遊玩家貪新厭舊

要知手機遊戲，有熱得快、凍得快的特性，唔信你睇吓身邊仲有幾多人玩緊Angry Bird！好多手遊公司紅一隻遊戲之後便無以為繼。話說回頭，去年底雲遊上市集資9億元，今次收購花費近半銀彈，小股東要密切留意「神魔之塔」之後，MF仲有冇其他「大作」可以吸引玩家。

光伏股繼續係市場焦點，漢能太陽能（00566）發盈喜，預告一三年盈利增長超過五成，以往績PE12.2倍，意味三月底全年業績曝光後，PE會降至8.3倍以下，昨日漢能股價升5.2%收報1.2元。

另外，摩根大通出報告上調信義光能（00968）目標價，由2.8元提高至3.3元，以反映下游銷售改善及營運槓桿提高的好處，同時上調一四至一六年盈利預測，至5.44億、12.03億及14.54億元，刺激信義光能股價勁升17%，收報2.47元再創掛牌後新高，一五年市盈率10倍，估值亦唔算太離譜，但驚就驚介紹形式上市公司，當股價升得火紅火綠之時，伸手要錢。

飢餓行銷策略成功

金山軟件（03888）昨升5.7%收報28.5元，再創歷史新高，因屬同一創辦人雷軍旗下的智能手機生產商小米，啱啱在港推出五千部新型號的小米3手機，38秒賣光，破埋早前在內地86秒售罄的紀錄（當日推出十萬部），基於市場上陰謀論者眾，揣測小米有借殼金軟可能，造成每次小米有大龍鳳，金軟例必炒埋一份。

毫無疑問，小米營銷策略真係好勁，無經銷下出貨數字只有自己知，但掀動輿論，免費做埋宣傳。聽行內人分析，話小米新型號手機推售價，應該稍低於生產成本，蝕住賣目的無非造勢，逼部件供應商減價達致正毛利。

老實講，古勝試過幾次上網買，都只係見到個「售罄」頁面。飢餓行銷對造勢，以及爭取上市時獲更高估值，肯定算十分成功，但對在下此等用家，猶如蜑家雞見水，得個睇字實在無癮到極。

古勝