絲絲講場：周松崗再創薪紀錄
港交所（00388）行政總裁李小加去年份糧「大加」，原來港交所一班非執行董事都唔弱，事關今年又再建議佢哋加人工，其中主席周松崗，袍金會由現時嘅90萬元，加到150萬元，上升足足高達66%，「加幅」拍得住李小加去年度總收入增幅嘅55%。至於其他非執董，袍金亦由60萬元，加到70萬元，加幅16.6%。
講番周松崗，其實佢舊年份收入已有好大進帳，達191萬元，較對上年度嘅95.7萬元，上升接近一倍。事關周松崗除咗港交所外，仲係港交所旗下倫敦金屬交易所（LME）非執董，及坐鎮LME幾個委員會。
任港交所主席袋250萬
若果今年港交所主席加人工，估計周松崗今年收入坐底都有成250萬元，份糧都幾厚。相信好多人都會羨慕佢，做非執行主席份糧，同打工原來相差都唔係好遠！
絲絲記得，港交所班非執行董事喺一二年時至加過人工，舊年「凍薪」，今年又再加過。但觀乎港交所嘅股價，長期停滯不前，唔知港交所啲股東覺得點呢？
委任期屆滿料再過關
港交所解釋，加薪建議係考慮咗顧問嘅檢討結果，但LME、LME Clear及場外結算公司嘅非執董薪酬就不變。
今年港交所股東會定於四月十六日舉行，兩名政府委任董事周松崗同范華達任期屆滿，由於佢哋只係做咗兩年，預計獲再度委任。
兩名選任董事郭志標同李君豪任期亦到，提名委員會已決定提名兩人參選。因此預計今年AGM應該冇乜火花，好平靜！
余絲韻