Market Insight：戰雲密布減倉為上

昨日俄羅斯股市MICEX開市急插一成，加埋有「人造人19號」之稱的北韓領導人，趁亂玩試射導彈，昨日成個市就咁畀兩單新聞玩殘。外圍散晒，恒指跌336點收報22,500點，主板成交比上周五縮近百億至668億元，上升及下跌股份分別513隻及892隻。

實話實說，個市跌得比古勝預期少，一來A股趁兩會開幕，估佢唔到可以逆市抽升18點收報2,075點，一句到尾，到底基金經理係未卜先知，預知烏克蘭今次內戰危機可以大步檻過？抑或歐美市場處於海嘯後高位大有獲利回吐可能而大家仲未識驚？只能等事過境遷後我哋至知。

古勝冇點你2014/03/04

萬里長空

炒作題材買少見少

不過，值得留意係，部分基金帳面極為豐厚的outperformer，好似澳門博彩股，在二月博彩收入報復式回升的消息公布後，股價一抽高隨即被大孖沙質到開巷尾，唔係太好兆頭，尤其聖誕及新年的賭客高峰期之後，三、四月打後，博彩收入季節性進入平淡期，總之就有胡唔食，罪大惡極。

昨日先講過，過百倍PE都敢買比亞迪（01211），更何況一堆業績無睇頭的充電池股，結果升幅同鑊氣成正比，中聚電池（00729）昨狂升37%收報0.74元，光宇國際（01043）升9.3%，連久不發市的飛毛腿（01399）都升5.8%，收報0.54元，可見個市真係相當缺乏炒作古仔，估計幾隻三四線電池股短期仲未玩完。

高鑫零售（06808）去年盈利增長15%至27.75億元人仔，毛利率微升0.9個百分點至21.6%，同店銷售增長則放緩1.3個百分點至僅2%，可見中央打貪，即使主攻送禮文化，唔直接衝擊走中低價特賣場路線的「大潤發」，但零售市道差咗對佢唔多唔少都有影響。

長實重估空間較大

以股論股，高鑫確實比其他內地零售股標青，但接近30倍PE市都貴絕同行，昨股價報復式上升7.1%收報9.45元，說穿了，乃去年底股價由13元樓上級級落的一次修正。心水清人士可能留意到，近幾個月高鑫沽空金額一直唔嘢少，好似上星期業績前，日日幾千萬，而最勁係上周五。昨日見瑞銀報告估算，借高鑫沽空的累積空倉可能達到街貨一成，或者等於22日均成交量。睇到呢到，相信大家多少估到，升浪好可能來自補倉買盤，而並非睇完份業績覺得抵買。

長實（00001）及新地（00016）份成績表比市場預期理想，但碰正跌市都無計，股價分別跌0.7%及2.6%。辣招底下，香港樓市一池死水，兩大地產商今次都係靠內地項目食胡。長實份全年業績及新地的中期業績，來自內地物業項目的貢獻，分別升20%及158%，相當於兩間公司EBIT的31%及24%，負債比率分別2.3%及12%。

炒消息謹記識落車

不過，大行提出如果將新地投得的上海地皮計入在內，實際負債比率18%，除非啱啱向股東以十二股送一份，行使價98.6元的紅利認股證全部被行使集資222億元，負債比率先返到12%左右。暫時睇，賓架對紅利認股證毁譽參半，但大都表示意外，一來新地上個月至發債集資，大股東三兄弟又啱啱完成股份分配，時機上真係敏感少少，二揀一，顯然旗下和黃（00013）準備將零售業務投資上市的長實，被重估的空間較大。

兩會開幕，一如預期資金湧晒落去環保及可再生能源股，金風科技（02208）、漢能（00566）、卡姆丹克（00712），最誇是近期升得唔少的中國高速傳動（00658）及泰坦能源（02188），分別升4.6%及30%，創埋52周新高，真係有啲過火，看官們跟消息炒記住識上車時，緊記氣氛一旦逆轉立即落車。

古勝