孖妹S檔案：識股暗號創錢途

雞蛋股

【解釋】指與街市所賣的雞蛋價格一樣便宜的股份，這些股份價格大約2至3元。

【王昕媛推介】

若以股價去睇，保利協鑫（03800）現價未夠3元，都有點類似雞蛋股，但該股前景又未必似雞蛋咁易跌爛。其實該股去年嘅多晶硅價格一直穩步回升，當時第一季度嘅多晶硅價格為16.62美元，第二季度為17美元，第三季度為18美元，第四季度為19美元，我預計今年其多晶硅價格仍可持續穩步復甦，行業應該已走出最差時期。保利協鑫亦預期，一三年全年業績將較一二年大幅減少虧損，早前更出資約14億港元收購森泰（00451）68%股權，我相信其意圖是為自己提供獨立上市平台，以實現其光伏電站之投資價值，長期減輕未來資本支出，有望長線利保利協鑫股價。

【保利協鑫目標價】

4元（上周五收報2.92元）

【高妹點睇】

股場上的雞蛋股向來唔少，散戶亦鍾意炒作，不過雞蛋咁脆弱，小心炒炒吓炒燶咗呀！

女人股

【解釋】指企業主打女性產品及服務，如服飾股、化妝品股、美容纖體股等，銷售對象亦多為女性。

【王昕媛推介】

女人一定貪靚，我睇好華熙生物科技（00963），它為內地最大嘅透明質酸生產商，旗下透明質酸產品「潤百顏」，更係第一個被國家食品藥品監督管理局（CFDA）所批准，為國產美容整形用注射填充產品，與其他同類型進口產品比較，例如瑞典生產嘅「瑞蘭二號」，其產品分子量不適宜淺層皺紋填充。

根據ISAPA嘅二○一一年數據，中國註冊嘅注射美容醫生已經超過2,000位，每年實施案例超過15萬宗，位居全球第三，但是內地人注射透明質酸的市場滲透率僅為0.18%，相比較南韓、台灣市場滲透率達2.1%及2.97%，市場發展空間龐大。

【華熙生物科技目標價】

30元（上周五收報21.85元）

【彩兒點睇】

連師奶都知道咩叫透明質酸，呢類型公司應該都好有前景啦！

牛皮股

【解釋】指市值逾百億元以上的大型股份，因市值較貴，令股價上落不易波動。這類股份上市時間較長，於行業內擁領先地位。

【羅尚沛推介】

友邦（01299）名副其實係牛皮股，股價平時好穩陣，但因為呢隻股每季都會出業績，往績亦可見佢季季都有錢賺，令股價多數於業績公布前後波動上升，不少散戶亦願意坐貨等候炒作。講番基本因素，友邦本身核心業務向來可保持增長，而保險經紀團隊又強勁，而且財政狀況無問題，唯一礙眼是其市盈率偏貴，派息率又低，但基本上我相信「平嘢無好嘢」，所以友邦值得中線持有o架，相信該股下季業績再公布時，股價有望炒上42元。

【友邦目標價】

42元（上周五收報37.95元）

【高妹點睇】

如果散戶財力雄厚，又有大把時間，真係可以提早入場部署友邦嘅每季業績期，要賺錢應該唔難。

龍頭股

【解釋】指企業的規模、市佔率、市值、營業額、利潤等財務指標，於同行業中擁有領導地位及影響力，其股價升跌往往對其他同業股份存在引領及示範作用。

【羅尚沛推介】

近期我比較喜歡蒙牛乳業（02319），佢身為內地嘅乳業股龍頭，首先具有行業領導地位，是首批六家獲扶持的奶粉「國家隊」，其次是它擁有奶源資源優勢，令產品質量有保證。現時內地政府極力扶持國產乳業市場，希望內地人飲多啲國產奶，相信扶持政策將會長期性進行，以及「單獨二胎」已經實施，預料市場對奶粉需求亦會相應增加。另外，預計蒙牛將於月中公布去年業績，我預料其全年盈利不俗，相信可獲資金流入炒作，不排除其目標價可見45元。

【蒙牛乳業目標價】

45元（上周五收報39.80元）

【彩兒點睇】

內地「單獨二胎」政策落實，令我都幾睇好內地乳業股前景股，不過蒙牛股價唔平，我就買唔起喇。

情人股

【解釋】指家傳戶曉，人見人愛，被市場公認為「好公司」的「好股票」，散戶和機構投資者都會長期持有的股票。

【羅尚沛推介】

恒生（00011）喇！佢夠老牌呀，實力雄厚，雖然業務策略永遠唔會進取冒險，但年年業績都有錢賺，兼且每年穩定派息約4厘，所以深得「好息一族」嘅散戶喜愛，當然亦有不少大型基金都會揸貨，仲唔係大眾情人股？不過，講明唔進取，所以大家亦唔好期望股價會大上大落，總之經濟好，股市好，恒生股價就會好。

【恒生目標價】

股價跟隨大市上落（上周五收報125.8元）

【高妹點睇】

如果純粹為年年收取穩定股息，買恒生真係一個唔錯嘅選擇。

國泰君安（國際）投資諮詢部副總裁 王昕媛

銀河證券業務發展董事 羅尚沛

若有料報畀高妹同彩兒或有嘢問，可電郵money.biz@opg.com.hk