Market Insight：電池股有勢跟炒

想從聯儲局主席耶倫身上探口風？一樣無計，上星期白髮Chairwoman出席參議院銀行業委員會聽證會時，話明美國部分地區的嚴寒天氣會影響開支數據，故難以斷定數據積弱情況會持續幾耐。

另一方面，佢唔排除暫緩退市，即每月縮減百億美元的買債規模，但同時又補定飛，話當前買債步伐不變，即係講咗等於無講。退定唔退，似乎最快要到十八、十九日的FOMC至有答案。

古勝冇點你2014/03/03

萬里長空

股神巴菲特上市旗艦巴郡派成績表，盈利達到創新高的195億美元（約1,521億港元），按年升31%，儘管巴郡帳面值五年來累升91%，但卻仍然跑輸畀標普五百指數公司同期的128%升幅，不過股神無認輸，話預期好快會重新跑贏標普五百指數，年度給股東的信中仲特別提到睇好美國經濟，巴郡也準備好進行更多大型收購項目。

西班牙步出谷底？

準備子彈「濕平」不止股神專美，上星期英國媒體報道，指大炒家索羅斯及「沽神」普爾遜（John Paulson），不約而同投資在西班牙一間房地產公司身上，事後索羅斯照舊不予置評。

依家西班牙全國四分之一人口失業，媒體上成日見當地在建物業爛尾以及新盤空置變成鬼城一樣的新聞，諗起股神金句：「別人貪婪時要恐懼，別人恐懼時要貪婪！」若消息屬實，或意味西班牙經濟最差時刻可能過咗。

近排人民幣弱到離譜，上周五低見6.1760，同一月中匯改後高位6.0393比較，已貶值2.2%，賓架界認定係人行教訓班賭升值炒家，來一次大挾倉。堅定流？真係唔知，睇周末公布二月中國官方製造業PMI數據，係就係跌落50.2，但總算高過50的盛衰分界及大行預測的50.1，趨勢係落緊，但情況唔足以令匯價崩圍式急插咁恐怖，人仔的走勢顯得更撲朔迷離！姑勿論點，匯價貶值之後，或者市場會認為對出口及航運股有利，短期可以睇番好些少。

電動車拉動需求

電動車是否泡沫？單係睇美國電動車鼻祖Tesla股價，一年之間由34美元炒上最高265美元，可見市場係炒完先諗。Tesla啱啱宣布投資50億美元建設全球最大鋰電池生產基地。一部手機、電腦或者數碼相機，先用一片充電池，一架Tesla Model S用八千幾塊，需求是必然。在內地霧霾下，愈來愈多城市支持電動車發展，諗落賣車初期只係甜品，充電池及其他配套設備，可能至係主菜。

比亞迪股份（01211）短短一個月內股價高低位差五成，上星期炒風蔓延至電池股，中聚電池（00729）在上周四、五合計升幅四成二，連一向無乜鑊氣的光宇國際（01043）都一度升逾8%，飛毛腿（01399）曾升4%。正路講，當然得自給自足的比亞迪揀得落手，其他唔係業績麻麻，就係交投太疏。但既然過百倍估值的比亞迪都炒得落手，其他電池股也未嘗不可。

賽晶績前可收集

上周五見報提及的手機股，通達集團（00698）股價果然上過1元，收報0.98元，升6.5%；酷派集團（02369）股價又再破頂，創五十二周新高5.36元，收升1.5%。本周除咗兩會行情之外，業績期將進入高峰，業績股亦係市場焦點。但唔係隻隻都炒得起，好似上周太平洋航運（02343）同博雅互動（00434）公布業績後，股價就齊齊插水，上周五同跌逾一成。

要搵業績消息下股價做好的股份，最直接當然係向盈喜股埋手，好似估計將於本月公布去年度業績的賽晶電子（00580），早前已發盈喜，預計去年度營業收入及純利均會顯著上升。

去年下半年起，公司公布接獲不少新的大額訂單，由於其產品應用於鐵路及電網，業務前景展望穩定，重估潮有望延續。趁交投淡靜，可留意在0.8元水平小注收集，博業績前後再次上試1至1.1元阻力區，失守0.78元止蝕。

古勝