景順集團首席經濟師祈連活最出名嘅事迹，莫過於為香港嘅聯匯訂立框架，換嚟「聯匯之父」嘅稱號，不過親生仔唔怕多，呢排佢攬埋蘇格蘭上身，為當地嘅貨幣提出意見，第時如果受採用，分分鐘再多一個朵成為「蘇格蘭貨幣之父」。
蘇格蘭將喺九月舉行全民公投，決定今後能夠獨立嘅命途，大家關心嘅當然係蘇格蘭獨立後如果唔用英鎊，又會用咩銀紙去維持匯率穩定性呢？
祈連活話如果效法香港建立貨幣發行局，以一蘇格蘭鎊兌一英鎊，喺冇英國同意下都可以同英鎊掛鈎，除非兩國經濟環境將來有大變動，否則做法對於蘇格蘭喺貿易、經常帳同埋資本帳結餘上都唔會帶嚟大問題，但可能易啲受到投機性攻擊。
不過佢大派定心丸，話最緊要都係睇蘇格蘭獨立後實施政策夠唔夠完善，如果喺財政政策、銀行穩健性同避免採用槓桿呢啲範疇上，都直接將香港嘅形式倒模過去，大家應該都可以放心。
咁獨立後嘅蘇格蘭有冇機會打造成好似香港咁嘅國際金融中心呢？祈連活就話當地兩大銀行蘇皇同HBOS都喺樓市泡沫期間蝕錢，依家大致上都受英國政府接管，所以就算蘇格蘭獨立，短期內都未必喺財政同金融政策方面喺外界贏夠公信力去支持到好似香港咁龐大嘅金融業。
祈連活呢個建議並不孤單，早幾日華爾街日報都有Blogger寫咗篇文章，都係叫蘇格蘭學吓香港咁話。
余絲韻