絲絲講場：國產4G機八百有找
講起主打低價高性能嘅國產智能手機，相信好多香港人都會諗起小米科技熱賣嘅紅米機，不過，原來酷派、華為等內地手機製造商都時有佳作。
好似酷派咁，最近就喺MWC 2014展會上發布咗內地第一款1,000蚊人仔樓下嘅4G手機 ――酷派8705，雖然係入門版，配置唔算特別出色，不過799人仔就有交易，淨係價錢已經夠晒吸引。
內地進入4G時代，除咗令智能手機更加普及之外，都勢必掀起新一輪嘅換機潮，酷派今次推出嘅酷派8705有4.7英吋螢幕，採用Marvell四核處理器，搭配1GB RAM同4GB機身存儲空間，雖然配置唔算好出色，但勝在夠平，作為入門機款，對於班大學生、普通白領都仲有相當大嘅吸引力。
酷派親民 唔使搶貨
有網友話，相比起小米主打嘅低價機款紅米機，酷派8705仲有個優勝之處，就係酷派冇採用「飢餓營銷法」，買家唔使吓吓要上網「搶米」，否則手慢啲都唔使旨意買到。
除咗最新推出嘅酷派8705，酷派早前出嘅新型號酷派大神F1，888元人民幣嘅親民價，都相當貼近紅米手機，迎合到內地智能手機市場需求，難怪內地傳話預售量已經過千萬部喇。
余絲韻