互聯網同手機做到嘅嘢，真係愈嚟愈多，絲絲追潮流追到氣咳呀！Paypal尋日又同絲絲分享新發展，講明同Samsung合作，冇蘋果公司（Apple）份，之前淘寶同八達通嘅合作，都係唔受Apple玩，睇嚟Apple要檢討吓喇。
佢哋依家同Samsung合作，打頭陣嘅合作手機係S5，四月就會喺包括香港在內嘅26個城市推出，到時用家只需用手指輕輕一掃，就可以通過指紋認證登入Paypal戶口畀錢，方便快捷！
Paypal香港、台灣及韓國地區經理James Mirfin話，嚟緊Samsung智能手錶Gear 2都有機會合作做指紋認證，不過就暫時冇同Apple傾，強烈睇好Samsung產品咁話！
用戶可以將多張信用卡連接去Paypal戶口，無論網上付款定係去實體店舖，開住Paypal個App用指紋認證或者打帳戶密碼就可以畀錢，最緊要係零手續費。
Paypal近期向小商戶力推Paypal Here，James話小商戶好支持，因為成本比向銀行拎信用卡收款機低，相信未來有更多零售舖收Paypal。
余絲韻