Market Insight：華晨估值貼近下限

騰訊（00700）昨升1.8%收報586元，差些少又再挑戰歷史高位591元，夠晒搶眼之外，手機及硬件生產商亦見鑊氣，通達集團（00698）升6.9%收報0.92元。特別一提，高盛調高酷派集團（02369）目標價，由5.2元去到6.1元，刺激股價勁升13.4%至5.07元。

高盛睇好理由包括酷派手機推出時間表，同與中移（00941）4G服務登場的時間配合，有利爭市場份額；其次係睇好公司網上銷售手機的策略。

古勝冇點你2014/02/27

萬里長空

大行睇法話變就變

老實講，近幾個月市場對手機股的投資興趣，真係熱情到估都估佢唔到，唔信？在三個月前，即舊年十一月中高盛先將當時仲叫中國無線的酷派，剔出確信買入之列，目標價只係3.1元，短短時間內睇法竟一百八十度變，目標價仲翻一番，真係乜都佢講晒。

本文一月中因為酷派在2014 CES發布十五款手機，以及豪情壯志，今年6,000萬部的出貨量，仲多小米目標五成，當時佢市值只及小米在投行界的吹水價十分之一，可能有多少投機價值。古勝亦都估唔到，六個星期時間股價升咗五成三，除咗呻笨無瞓身之外，都真係無話可說。

上星期咁啱搭到比亞迪（01211）電動的士，老實講，內籠確係及唔上皇冠咁寬敞，不過依家空氣污染日益嚴重，為環保兼且司機身體健康（師博話每七、八個鐘，同架車一齊叉叉電！），都係值得推廣。近排比亞迪股價無受市況反覆影響，昨升9.6%收報47.85元，返回一○年第四季水平。

新晨動力亦見吸引

睇番股價由巴菲特入股後高位88.4元，撻到落10.92元，距離0.5跌幅阻力49.66元已經好近，以股論股，一五年市盈率可能仲響50倍樓上，一啲都唔平，但近期內地大力發展電動車配套設施，天津啱啱推《新能源汽車推廣應用實施方案》，建66個充、換電站，在全市建造6,700個充電樁，北京亦話短期內發布第一批新能源候選車型，同時在市中心區打造半徑平均5公里的充電圈。基金經理都係追概念，唔通會因為Leaf買日產，又或估值不相伯仲的Tesla咩？

近期比亞迪醒神外，大部分車股頭耷耷。講到尾，賓架驚內地政府就霧霾天氣，會有針對車業的政策。不過，亦因為咁，唔少車股返到去吸引估值水平。

昨日留意到單內地新聞，話說為要同Audi收窄在中國市場的距離，寶馬要催谷其內地合營夥伴，在瀋陽鐵西區的引擎廠，產量要一六年前翻一番，由每年20萬去到每年40萬。

查實由華晨（01114）及引擎供應商新晨動力（01148）畀芬佬的極樂觀營運指引，斷估同今次數字相差唔遠，不過換轉由寶馬開口，說服力大好多。華晨一四年PE 11.2倍，貼近五年歷史估值10.9至34.3倍下限，以兩間公司今明兩年的業績增長預測，真係幾抵買，趁未起鑊可以諗諗佢。

老恒和貨源極歸邊

內地料酒生產商老恒和（02226）在上月下旬掛牌，發售價7.15元。掛牌後股價反覆向上，本月上旬見高位10.82元後回軟，惟見股價調整期間成交縮減，反映沽壓不大。昨日該股重現陽燭，收報9.61元，升幅5.4%，成交4,476萬元。

古勝翻查資料，此股第一及第二大股東合共持股約72%。再上港交所（00388）睇埋「花紙」，已申報的27.66%街貨持倉中，首十名持股已佔公司股權19%，顯示此股街貨極為歸邊。等班大戶一發號令，可以炒到你唔信。

之不過，以現價計，一三年度預測市盈率約26倍，估值唔算便宜，且一般而言，貨源極度歸邊的股份，股價一係唔行，一行上、落波幅都可以好大，沾手者宜注意風險。

古勝