股神巴菲特無論講乜，大家都當作名言，特別係佢每年寫畀股東嘅「給股東嘅信」，更加唔會錯過，今年嘅出咗喇，五個大方向，雖然都係啲成日講嘅原因，但係佢做到股神，我哋唔係，就係因為佢夠耐心，信就要跟住做。
巴菲特勸喻股東，投資股票時唔好密密炒，應將股票當成投資房地產一樣，睇長遠潛在利潤，即使短期價格Chok到嘔，都唔使理。仲有一個原則：千祈唔好買自己都唔明嘅產品，所以科網股一直唔係股神杯茶。
佢喺信入面提到自己投資兩個小型房地產嘅經驗，分別喺八六年及九三年房地產市場出現泡沫時，買入一塊400英畝嘅農地，同埋紐約大學附近嘅零售房地產，睇好佢哋回報率可達10%以上。
佢透過呢兩個例子，希望大家喺投資時要將重點擺喺未來生產力上，而唔係僅僅期待將來以高價賣出資產。另外，佢仲提醒投資者切忌對股價表現得唔理性，而跟隨大圍意見，其實亦等於係浪費時間。
聽完股神嘅一番至理明言後，各位有無被點醒？如果你仍然覺得唔夠喉，或者可以留意五月舉行嘅巴郡股東大會。
呢個被稱為「資本主義者胡士托」嘉年華嘅活動，每年都吸引三至四萬名股東參加，股東嘅心態就好似朝聖咁，會上除咗可以一睹股神風采外，精彩節目亦多到一籮籮。到時將可以參觀巴郡收購嘅私人飛機同聚餐，上年佢哋仲喺奧馬哈搞咗個「Invest in yourself」嘅5公里跑步比賽，今年呢個活動亦都會繼續舉行。
余絲韻