上月底退下火線嘅美國聯儲局前主席伯南克有新搞作，就係籌備推出回憶錄。回顧伯南克八年主席任期可謂驚濤駭浪，唔止遇上百年一遇嘅金融海嘯，祭出所有法寶拯救經濟，部分救市措施更加係史無前例，由伯南克呢位救火隊長親述經歷，必定甚有「睇頭」。
伯南克話，本書主要會講述佢喺聯儲局整個工作生涯，即係由○二年加入成為理事，到○六年獲時任總統布殊委任為主席，之後再獲現任總統奧巴馬委任續任四年，當然亦唔少得○八年金融海嘯以及經濟衰退，仲話希望人們了解到局方知道啲咩、幾時知道，同埋點樣作出行動決定，同應付高度不明朗嘅經濟問題。
伯南克任內「戰績」的確甚具爭議性，特別係「放水」行動，令聯儲局資產負債表規模膨脹至超過4萬億美元；伯南克一方面畀自由派批評做得唔夠多，另一方面又畀保守派批評做得太多，仲曾經畀共和黨總統候選人斥責為叛徒。回憶呢段風雨飄搖嘅日子，伯南克笑道，會藉出書幫聯儲局嘅救市行動辯護，並表達效忠國家嘅意志。
不過佢仲未動筆，依家仲整理緊思維同埋跟出版商磋商，預料要花約一年時間撰寫，並且會親自執筆，但資料搜集上會尋求外援，即係各位要等一段時間先至拜讀到佢嘅大作。
余絲韻