絲絲講場：中銀講投資向棋王偷師

侯逸凡分享策略

讀者可能以為做得國際象棋大師，肯定年過六十飽歷滄桑，查實侯逸凡係一位嬌滴滴嘅美女，年僅19歲就攞咗三屆女子國際象棋世界冠軍，蓋茨都話值得大家學習。

佢同在場嘅觀眾話，捉棋嘅時候要非常專注，唔可以畀情緒影響表現，同埋落棋無悔，所以要有策略同諗得長遠啲，但同時間又要識得臨場應變，唔怪得佢哋話捉棋同投資嘅方程式一樣啦。

芬佬棋手講紀律

呢個正係請佢嚟嘅原因，中銀香港資產管理行政總裁區景麟（King）話，優秀嘅基金經理正如一個優秀嘅棋手，需要有耐性，又要嚴守紀律，最緊要係捉棋難免會輸，好嘅棋手識吸取教訓，好嘅基金經理都會從失利中學習，King仲話自己三個囝囝都有學棋添！

雖然侯逸凡站喺世界棋壇最高端，但佢話今日嘅成就超過九成靠後天努力。六十四格棋盤以外，佢話自己只係一個平凡女仔，絲絲好佩服佢咁謙虛。過幾日就係侯逸凡20歲生日，中銀好貼心咁整咗個特大棋盤蛋糕畀佢。

余絲韻