Market Insight：家電股耐心收集

香缸股民又一次蜑家雞見水，A股連續四日開得高收daylow，一枝又一枝大陰燭，挑戰緊港股玩家忍耐力。昨日大市最巴閉時升130點，午後隨着滬綜指山泥傾瀉的影響，倒跌71點收場，報22,317點，主板成交654億元，比周一升近一成四。

滙控（00005）真係衰咗太耐，無期望就無失望，加埋今年股息有5厘提供足夠緩衝，趕客業績後，大行目標價及評級普遍係小修小補，中金及大摩都叫人增持，睇100元及90元，瑞銀話中性睇85.5元，已屬口淡淡之流。但銀紙最唔識講大話，昨日滙控一隻股票跌2.6%，等於拖低恒指94點，一加一減，換句話無滙控因素影響，其實個市無跌兼且升，認真陰陽怪氣。

人仔貶值拖低A股

昨日見唔少當炒二三線股倒水一樣，個市有938隻股票向下，得479隻錄得升幅，升跌股份比例1：1.95，與恒指唔多跌得落，有好大對比。會唔會同衍生工具力圖在結算前力頂有關？星期四結算前後會有答案。更弱勢的是國企股，成分股一升五跌，跌多升少情況連續第四日。話人仔匯價近排急跌，同A股連續四日插水無關係，真係搵鬼信。

古勝冇點你

萬里長空

一月份內地出口及外資流入數據本來唔曳，但美金兌人仔由一月低位6.0393，去到昨日6.1234，個多月時間人仔貶值1.37%，對比成個一三年升值3%，近期跌勢之急可想而知。有大行分析認為，人仔穩定升值日子，隨着人行應對外資流入，引發的信貸過熱現象做管理而告一段落，短期美金兌人仔會在6.1算水平穩定落嚟。古勝第一時間諗起，○九年開始習慣年年買國企股，業績增長有額外匯率好處的投資者，看來要適應一下新遊戲規模。另外，香港及新加坡的離岸人民幣好倉，已經開始unwind。

維達業績有機重估

市況不穩，繼續向心目中safety margin夠高的股票埋手，諗起維達國際（03331），現價12元，比去年納指上市護理產品巨擘SCA收購作價每股11元，高出唔夠一成，一四年市盈率19.1倍，比恒安國際（01044）23倍平一成七。

較多港人認知的SCA產品，相信是紙手巾Tempo，查實佢手上護理產品品牌，仲有TENA、Tork、Libero及Dr.P等，覆蓋中高檔次嬰兒及成人紙尿片品，去年第四季SCA重整內地業務，包括清理舊庫存，今年始通過維達現有全國銷售渠道推出新產品，加上國家修訂一孩政策，可見的一兩季內，維達業績預測獲重估機會唔細。

收購完成後，維達最高見過14.2元，一月的跌市中可見，11元收購價明顯有支持，內地紙巾生意飽和，今年上半年紙巾毛利率難會有大改善，是捧場客不願見之事實，但SCA為top line（銷售額）帶來的好處，暫時看來是被投資者所忽視，如果受市況偏軟落番12元樓下，中長線投資諗得過。

海爾策略明顯優勝

內房行業前景看淡，除咗影響內銀股及建材股之外，對其他行業的影響亦逐步反映，好似昨日兩地家電股均受壓，事關樓盤交投表現足以影響家電銷情。海信科龍（00921）股價由全日高位13.52元回落至12.5元收市，跌幅7.6%，成交2,714萬元；夥阿里巴巴合作電貿物流業務的海爾電器（01169）亦難逃一跌，昨日收報22.75元，跌3%，成交1.36億元。

國家政策繼續推動城鎮化發展，輔以「單獨二胎」政策，料可為市場需求面增添穩定因素，只是家電股面對勞工成本上升，以及產品更新周期迅速等挑戰，要維持毛利率穩定有一定難度，加快拓展線上線下業務優勢互補，提升整體營運效益才是出路。在這方面，海爾往績可說有目共睹，每次調整浪皆可留意收集機會。

古勝