在極差的非農數據包裝下，聯儲局主席耶倫千呼萬喚始出來，但一如預期係雷聲大雨點小。
耶倫始終唔係歐洲央行行長德拉吉、亦都唔係日本央行行長黑田冬彥甚至英倫銀行行長卡尼，一上場就需要建立形象，如德拉吉就聲大大要攬歐元區、黑田東彥首次上任就加大量寬、卡尼就跟聯儲局推前瞻指引。
不過，耶倫在聯儲局做咗三十幾年，上任前亦都做咗三年副主席，畀着你係耶倫，會唔會即刻一朝天子一朝臣，推翻伯南克年代政策？
咁樣做對聯儲局的公信力都打折扣，所以耶倫講話可算係打穩陣波，繼續話退唔退市要睇未來經濟數據，但強調會維持低息，雖然無驚喜，但對市場衝擊亦都最細。不過，耶倫都有提過新興市場根本影響唔到美國經濟，解釋咗一月聯儲局退市時對新興市場風險雖然隻字不提，但聯儲局暗地裏點會唔留意呢，結果市場即時沽美債買美股，令十年債息又回升至2.7厘而道指都反彈，美元短線有支持。
既然已經排除聯儲局加快收水的預期後，短線只會維持縮減100億美元定係減慢收水，相信直至三月耶倫首次主持聯儲局議息會議前，市場都會炒作有機會減慢收水而美元難以大升。
上半年強勢貨幣英鎊同紐元自然抽升，而進入馬年後立即轉運的澳元，都一樣持續反彈，升至短線目標0.9050至0.9080都未見明顯沽壓。
若想做淡澳元都應該避避風頭，尤其係澳洲商業信心加強而樓價又高，馬年後數據都轉好令澳元暫時沽唔落手，而失業率上升是意料中事，預期澳元仍有空間反彈，支持位在0.8830，目標睇0.9170。
GMO CLICK環球通副總裁 陳健豪