絲絲講場：孔慶平：退休後學識卸膊
舊年八月已經辭任中國海外（00688）主席嘅孔慶平，退休後做咗母公司中海集團副董事長，尋日佢地搞團拜，孔慶平都有嚟聚下。佢笑言，呢幾個月學識咗「卸膊」，叫大家唔好再問咁多中海嘅野。喺就喺咁講，但有好多問題，佢都喺有問必答嘅！
拋波畀郝建民蕭蕭
個個都想知，嚟緊中海中港兩地業務嘅發展，孔慶平就叫大家唔好問佢，要問就問主席郝建民同副主席蕭蕭，將啲「波」拋晒畀其他人。一向都好鍾意講笑嘅孔總仲話，無做主席呢半年時間，佢學識咗「卸膊」，睇佢尋日嘅表現，「卸」得麻麻啫，好多野佢都肯答！
雖然無做上市公司高層，不過佢話都仲喺好忙，而家仲多咗飛北京，下個月亦要去參加兩會。一向都鍾意靜嘅孔總話，早排放農曆新年假，佢無去到旅行，反而吼大家出外旅遊，返咗老家過。佢仲話，農曆新年期間，北京人又少、空氣亦好咗，半個鐘已經可以由東去西，仲講笑話感覺北京好似細咗好多添！