絲絲講場：教主廿年前睇好網購
屈指一算，有「蘋果教主」之稱嘅蘋果公司創辦人喬布斯過身都已經三年，佢接近廿年前嘅電視訪問完整版本，終於「出土」，呢個咁詳盡嘅訪問，睇到教主嗰種遠見幾咁驚人。
呢段70分鐘訪問片段，由美國紀錄片製作人Bob Cringley喺一九九五年操刀，當時喬布斯除咗講創業之外，甚至預言咗互聯網嘅發展，節目播咗當中10分鐘嘅精華，母帶更加失蹤咗，最近至搵番一份副本，訪問內容重見天日。
當時，喬布斯被問到「點睇未來10年嘅技術發展趨勢？」佢立即話：「睇好互聯網。」，佢仲預言：「網絡購物將取代電視購物，最終成為最直接嘅銷售渠道。」大家唔好以為馬後炮，當時一九九五年，全球只有4,000萬網民；2萬多個網站，而今日嘅電子商務巨頭亞馬遜當年成立唔夠半年，但「教主」在近二十年前已經預料到電子商貿會有今時今日嘅發展。
拍過叻人難返轉頭
喬布斯雖然係公司嘅靈魂，要發展就要團隊合作，佢話最緊要搵到5個真正「A級」嘅人，蘋果公司嘅「Mac機」就係咁由一班精英打造出來。佢仲笑言，同A級人合作，從此就不願同平庸嘅人埋堆。佢又話入到呢行好好彩，因為真係好多精英，因為喺生活上大多數「最好」同「普通」之間嘅距離不超過兩倍，例如紐約嘅的士司機或者CD機（當年好流行），「最好」同「普通」可能只差20至30%，但在軟硬件行業，好壞之間就可以差50倍甚至100倍。
余絲韻