以狙擊中資股而知名嘅美國渾水創辦人Carson Block，最近連番出招都有斬獲，最新係沽空倫敦AIM掛牌嘅視頻搜索引擎商Blinkx，得手之餘仲話係睇博客文章得到靈感，原來搵錢係咁易嘅。
話說哈佛商學院助理教授Benjamin Edelman，早前喺網誌強烈質疑Blinkx有欺騙廣告商、誇大公司業績之嫌，仲好肯定咁講，如果自己有買Blinkx嘅股份，就一定會沽晒佢咁話。
呢篇網誌嘅威力非同小可，令Blinkx股價上個禮拜大跌三分之一。Edelman又好坦白咁話，發表呢篇文章係因為自己收咗匿名人士嘅錢。
不過，姑勿論Edelman篇網誌有冇利益衝突，Carson Block睇完網誌就信到十足，即刻走去沽空500萬美元嘅Blinkx股票。佢話早就懷疑Blinkx公司盈利嘅真實性，而且開始調查呢間公司，而Edelman篇網誌令佢更加確定自己嘅想法，於是決心出手。
舊年年底佢發報告沽空喺美國新上市嘅中概股網秦，令該股股價曾經大冧五成。難怪佢早兩日上彭博電視接受訪問時意氣風發，直言投資者唔聽佢勸告，至有新興市場走資風潮。
余絲韻