絲絲講場：鴻海印尼開廠神鷹護駕

唔知係咪想分散投資風險，鴻海董事長郭台銘去咗印尼，同當地企業傾緊合作生產手機，仲計劃將品牌命名為「神鷹移動」（Mobile Garuda），唔單止貪個名夠晒霸氣，另一主要原因，係印尼國徽係一隻金色神鷹。

據講，鴻海將派人去印尼日惹特區，傾設廠一事。印尼工業部長透露，鴻海好可能喺該區興建手機廠，依家正忙緊處理準備工廠土地，同興建工廠嘅相關法規工作，希望鴻海加快投資進度，確立設廠時間表。佢仲透露，鴻海想將喺內地嘅經營方式搬到印尼操作，但佢直言相當困難，因為印尼無免費土地提供畀鴻海咁話。

查實郭台銘前幾日已經抵達雅加達，同熟悉兩地嘅印尼留台校友聚餐。絲絲聽聞此行目的係為咗藉住同印尼留台嘅校友混熟，乘機發掘印尼專才，為佢嘅手機團隊招攬人才！

至於點解手機品牌要叫做「神鷹移動」呢？原來神鷹象徵有強大嘅力量同勇猛無畏嘅精神，所以入鄉隨俗，鴻海嘅產品都改番個切合印尼人口味嘅名。

余絲韻