絲絲講場：陳韻雲點醒 有樓唔算成就

鍾情白加道位置好

近年佢頻頻出手，最觸目係斥資5.38億元購入山頂白加道28號的3號屋，Vivien話係用嚟長線收租，絕非炒賣。想當年，佢三十幾歲先至置業，首個物業就喺英國，當年一筆過以20多萬英鎊買入一幢三層高大屋，收租四年因為太煩賣咗，賺咗一兩成，其後將資金調返香港。舊年佢舊地重遊，專程返去望望間屋，經紀話現時「冇放盤」，估計市值係當年買入價嘅十倍。

佢好謙咁話，「清晒袋」去買白加道間屋，諗住同美國學成歸來嘅仔仔同住。佢話喺白加道住咗八年，睇住3號屋興建，好鍾意嗰度喺霧線以下，返工又方便。不過收鎖匙至今，都未諗掂點裝修，皆因過年後又要搬寫字樓，公私兩忙。

向「on.cc東網」讀者拜年

雖然間屋未確定點裝修，但鍾意煮幾味嘅Vivien，就覺得新屋廚房較細，想搞大佢，又想喺花園預留地方做有機耕種，養返隻狗仔，為退休生活做準備。之前買入嘅壽臣山Shouson Peak洋房，就考慮放售，但價錢仲未定。

佢喺香港以外嘅唯一物業，就係喺九六年買落嘅北京長安俱樂部大廈，一個面積約3,000方呎寫字樓，佢話當年以摸頂價1,000萬元買入，但十幾年嚟唔使搬來搬去，覺得已抵番晒。

另外，佢尋日同「on.cc東網」嘅讀者拜年，祝賀各位都新年快樂、事事如意、步步高陞、身體健康、龍馬精神。

余絲韻