期指觀瀾：避過夜風險宜即日鮮
多間大行護航，濠賭股反彈，支持連跌三日的港股回升。不過，相對過去三日累積逾870點跌幅，昨日恒指153點的升幅，顯見博反彈的仲係投鼠忌器，尤其仲未可以確認，大戶經已放棄趁外圍風高浪急，將大市推番落20,600至21,200點的牛證街貨密集區。
至於今日A股復市有可能補跌，以及今晚美國公布一月就業數據，都可能觸動資金撤出新興市場的神經。
值得留意，港元弱勢在過去三日明顯有改善，由7.7670附近，執筆時回升至7.7598，超過農曆年假前跌浪的0.5反彈阻力，或多或少，資金外流的最壞時間可能已過。
期指昨收21,332點，成交4.7萬張，早市見過21,388點高位，午後好友嘗試攻堅，最後在21,378點無功而還，假如今日滬綜指情況不致太壞，例如萬眾期待穿的2,000點大關守得住，期指有機會先反彈見一見21,545至21,595點之間。
礙於今晚美國就業數據，儘管ADP私人企業就業數據麻麻，但市場對於一月收復前一個月因為壞天氣影響的信心似乎相當爆棚，最新預測非農職位18.3萬個。但無謂賭大細，今日就算A股唔太差入市博反彈，筆者都決定唔會過夜，等下星期一再諗過。
John Mullen