Market Insight：新能源股漸見支持

早兩日古勝提過以恒指計，大市返回過去一年高低位19,426及24,111點的中間價，即21,768點水平樓下，相對於去年十一同十二月，目前整體市況相對吸引（撇除估值處歷史高位的濠賭股以及內地網股），或者係中長線投資者開始考慮分段入市的時機。

然而，睇番今次資金撤出新興市場，確實山雨欲來，昨日睇份統計，話今年一月由新興市場ETF撤出的資金達到88億美元，乃區內ETF出現以來首見。

古勝冇點你2014/02/07

萬里長空

巨無霸如MSCI新興市場iShares錄得近兩成淨贖回，另一隻Vanguard FTSE新興市場ETF，亦錄得○五年開辦以來最大單月贖回，最重要係，依家MSCI新興市場平均估值，較已發展地區足足折讓四成，係金融海嘯以來最大。

新興市場有排抖

跨國基金恐慌的舉措，就算反應過敏，這程度的撤資從經驗話畀我哋知，短期內（講的是一至兩季），資金重回的可能性實在唔大，超賣再超賣後，大市可能有短暫技術反彈，之後再呈低位徘徊的悶局。

就算基金摒棄新興市場，股市都總會有逆市奇葩。昨日英國媒體報道，和黃（00013）計劃分拆旗下零售業務屈臣氏集團，並考慮將部總遷至英國，為上市做準備。消息隨即被和黃否認，也表明未決定是否將屈臣氏分拆，但股價依然升1.6%收報96.75元。儘管近日跟隨大市回落不少，事實過去一年和黃股價累積升幅12.8%，跑贏同期恒指7.8%跌幅幾條街。

講到底，在本地股市中，要數歐美資產豐厚的，非和黃莫屬，業務覆蓋零售、港口、電訊同能源，去年中期收益，中港兩地僅佔15%及11%，歐洲佔43%最大部分，加拿大佔15%。如果押注成熟市場，同時要減磅新興市場，尤其以長短倉位操作的對沖基金，Long和黃、沽空其他中港綜合企業的便合情合理。

和黃已具值博率

近排見和黃股價由一月中106.7元碌落95元守咗幾日，看來短期搵到支持，會唔會上番105元樓上？昨日野村話一一年和黃分拆港口業務上市時，NAV折讓收窄到10%樓下，個價比佢哋計的一四年每股NAV136元足足折讓28.8%，似乎由市場資金流取向，以及押注分拆落實去考慮，現價都仲有相當值博率。

大市反彈雖然冇咩力水，但仍有個股表現能跑贏大市，與手機相關股份仍然係炒家焦點，昨日輪到晶門科技（02878）及A8電媒（00800）發力，升幅分別為13%及18%，但會唔會又係一日貨仔咁短癮就話唔埋，跟炒最好即日埋單計數，以策萬全。

講到科技相關股份，周二中國安芯（01149）宣布收購交易，股價不升反跌，估唔到前日收市後，公司主動澄清交易通告披露的「該等溢利保證」係8,000萬元而非8億元，咁大差誤，難怪昨日股價再跌8%，最後收報1.67元，小股東真係睇到頭擰擰！

煤炭股尚未轉勢

近日市況有個現象，就係低殘板塊反而在弱市有表現。繼前日水泥股逆市升，昨日煤炭股亦做好，神華（01088）、兗煤（01171）及中煤能源（01898）升幅介乎2至5%，永暉焦煤（01733）亦升6%。不過，論基本因素，煤炭股未走出低谷，單日升勢只能以超賣股份作技術性反彈看待，別對號入座。

此外，個別新能源股亦開始見支持，好似金風科技（02208）升3.6%、華能新能源（00958）升2%、比亞迪（01211）升3%。好快又到三月兩會，會議議題之一相信不離推動節能環保，空軍對新能源板塊有所顧忌，除非月底前內地市場再現大波動，否則呢個國策板塊低位有得博下。

針對汽車股，近季股價由強轉弱的長城汽車（02333）昨日逆市跌5.9%收市，走勢好明顯已大不如前，要買汽車股，古勝覺得今年專做新能源汽車的比亞迪較有機會跑出。

古勝