期指觀瀾：謀定後動勝算更大
今日係「立春」，筆者祝廣大讀者馬年行好運，財源滾滾來。其實港股在整個蛇年都好反覆，加上資金炒股不炒市，部分板塊例如濠賭股及網遊股炒到飛天，但恒指成分股就自成一格。不過，既然馬年剛至，只要大家能做足準備，「一馬當先」地落注，相信亦可由頭贏到尾。
講番港股，雖然蛇年最後一個交易日得半日市，但並不平淡。受美國宣布再收水100億美元、內地銀根緊張及中國經濟增長有放緩迹象，港股蛇尾先裂口低開約314點，其後就拾級而上，收報22,035點，跌106點或0.4%，主板成交492億元。國指就較失色，蛇尾只收於9,818點，跌79點或0.8%。
至於期指亦只得半日市，早段低開後於十點前已見全日低位21,705點，其後反覆向上並升至接近全日高位收市，報22,009點，跌94點，低水26點，未平倉合約105,470張，唔少投資者選擇「責」貨過年。
策略上，純睇技術走勢就未有太大啟示，但剛公布的中國一月份非製造業PMI連跌三個月，加上日圓繼續大散，日經指數昨跌近2%，今日港股開市都係比較難搞，故大家可考慮再放多日新年假，先觀察本周初市場氣氛後才再落注，相信勝算更大。
John Mullen