炒避險的主題炒咗幾日，有紓緩的迹象，全靠新興市場國家土耳其同印度央行先後出招加息，希望防止資金流走穩定匯價。市場氣氛即時改善唔少，惟擔憂仍然存在。
新興國家呢幾年其實面對兩難局面，通脹高、經常帳赤字嚴重但經濟增長低，央行成日只可以頭痛醫頭、腳痛醫腳，如土耳其政府一路畀壓力，希望減息刺激經濟及扭轉經常帳赤字，如果唔係匯價跌到歷史低位央行都未必落重藥。
除咗印度同土耳其，另一個經典自然係巴西，息口大上大落已經司空見慣。不過，就算息口再高，投資者今年都未必有興趣買呢類貨幣，因為爛的水果始終係爛，今年投資方向係要將每一隻外幣汰弱留強，投資主題集中係炒復甦。
至於復甦的動力來自美國、歐洲同中國三個地方，但三個地方的復甦又未算好強，久唔久出壞數據又會令市場存在懷疑論，如果新興國家結構性問題無改善，都好難令投資者為咗高息而去冒險。
如果真係要揀，一些對出口相關度比較敏感的「復甦概念貨幣」例如韓圜、馬來西亞幣及台幣都可以留意吓。講到尾，聯儲局退市，資金回流歐美仍然係大趨勢，新興市場走資速度會減慢，但趨勢會持續，外匯投資還是集中在主流貨幣身上。
GMO CLICK環球通副總裁 陳健豪