舊年底開始，中國包裝（00572）連同佢個主席何健宏爆出被追債，搞到公司停咗一輪牌，股價仲跌得好甘吓！尋日公司終於同主席嚟個「了斷」，發通告話，因為何生「失蹤」咗，所以暫停晒何生所擔任嘅主席同埋執行董事嘅職務，已經喺本周一生效。同時，公司已搵咗兩個執行董事返來，以維持公司日常運作咁話。
公司解釋話，由舊年十一月開始，何生就長期無故缺席，而且一直未有就聲稱擔保而回應過公司嘅查詢，加上何生依家為申索嘅被告之一，所以公司覺得暫停佢嘅行政職務係符合公司同股東利益嘅。
絲絲翻查啲資料，舊年公司十二月發通告，話收到若干公司嘅通知及追討書，指集團作為合共8.42億元債項嘅擔保人，當時公司即刻同件事劃清界線，對有關擔保並不知情，會等何生回港時澄清。
至到今個月中，公司連同主席一齊遭債權人正式入稟高院追討6.43億元人仔。
余絲韻