近期內地財金部委掀起新一輪執位浪潮，繼中證監主席肖鋼傳出或調位後，尋日路邊社再有兩單人事調動傳聞，一單係舊年曾積極鼓吹延長退休年齡嘅戴相龍，已喺內部會議上宣布咗，會由全國社保基金理事會黨組書記個位上面退落來。而另一單，係被譽為「中國外儲多元化首席功臣」嘅朱長虹，被證實已經辭去咗外匯局首席投資長嘅職務。
講起戴相龍，香港人最有印象嘅，應該唔係佢喺社保基金咁多年嘅表現，而係○七年佢仲做緊天津市市長時推動過嘅「港股直通車」，可惜呢個構思經過咁多年，到依家都仲未可以實現。其實戴相龍今年都將年滿七十歲，一早就超過內地60歲嘅法定退休年齡，對於佢宣布退休嘅消息，尋日市場反應都相當之平靜。
反而係外匯局首席投資長朱長虹辭職嘅傳聞，引起市場高度關注，事關佢雖然為人低調，但過去幾年喺中國外儲經營管理嘅系統建設、資產配置、組合管理、交易執行等方面貢獻良多，投資能力亦備受讚賞。
外匯局尋日已證實朱長虹辭職嘅消息，但就冇公布接任嘅人選。朱長虹離任之後，內地外儲投資風格會有咩改變，大家真係要拭目以待喇。
余絲韻