阿里巴巴多方位撼騰訊（00700），手機遊戲平台戰場尋日開鑼，主打遊戲數目唔算多，但噱頭十足，有網民話，其中兩個主打遊戲都包含「打企鵝」嘅場景，使人聯想到阿里係咪借故攞騰訊嘅吉祥物QQ企鵝嚟開玩笑！
事先聲明，絲絲暫時未玩過呢款手機遊戲，所以對遊戲裏面嘅「打企鵝」情節只係一知半解。不過據內地網民話，阿里透過「來往」推出嘅「來玩吧」平台，主打嘅《啪啪啪》與《啵啵啵》均巧合地加入打企鵝嘅場景。
甚至有八啩傳聞話，隨住網遊平台上線，阿里內部正興起一股「打企鵝旋風」，首席執行官陸兆禧不單玩埋一份，喺遊戲排名中獲得第二名。阿里主席馬雲早前講過，要阿里開展「火燒南極」戰略嘅說法，咁打企鵝又幾符合呢個口號喎。
馬雲搞手遊，當中發生咗啲風波。有媒體早前報道，馬雲妻子張瑛為咗看管沉迷網遊嘅兒子辭去阿里工作。馬雲幾日前喺自己個「來往」帳號澄清，呢個說法係假嘅。
佢尋日又係「來往」帳號中，分享一篇有關「堅守承諾不容易、打破承諾更不容易」嘅短文，當中提及時任新加坡總理李光耀，對於新加坡由禁賭變成容許賭場經營嘅感言，大有為阿里破例涉足網遊同手遊解畫之意。
余絲韻