Market Insight：尋找逆市呈強板塊

其實，資金流出新興市場始自去年末季，若然美國的收水規模真係比想像中大，而企業業績又遜預期，美股升勢無以為繼，咁歐、美股睇唔好，新興市場又話風險高，資金尚有何出路？平常心去諗，反正指數呈上落市已有一段時間，搓波搓咗咁耐，來個大波幅洗洗牌，有危才有機。港股有大批中資坐定定維穩，魚缸亦不乏炒作主題，唔見得跌市如同世界就要末日！

大戶料已達成目的

論短線走勢，過去兩個交易日，恒指先後失守250日線及22,000點心理關口，大量牛仔被劏，相信大戶已達屠牛目的。另一角度睇，從上周部分股價急挫的濠賭股，昨日逆市靠穩收市，相信農曆新年前大戶製造的一次大龍鳳已告完畢。

古勝冇點你2014/01/28

萬里長空

若排除美股再度急挫，又或是周內公布的經濟數據與預測值偏離太遠，則春節假前港股會維持在21,800至22,200點水平浮沉，等收浸貨再在季末業績高峰期及季結前才現新方向。

呢期古勝一路都話，少睇指數，繼續埋首追蹤異動個股。好似昨日魚缸刮起大風大浪，但覆巢之下，卻仍能找到「完卵」，當中唔少係同4G通訊及科網主題有關的股份，好似TOM集團（02383）上升9%、中芯國際（00981）上升6%、TCL多媒體（01070）升11%。

上周宣布獲阿里巴巴入主，股價急升的中信21世紀（00241），股價亦不見得有太大沽壓，即使排除阿里借殼上市的可能性，在阿里這位超級科網企業作為控股股東的支持下，相信總比「中信」時代天天呆坐好。參考去年內房殼股的玩法，今年科網殼股必有一番作為，而中信21世紀有機會成焦點股！

事實上，今次科網熱潮，與二○○○年唔同的地方係，十幾年前大家只係懂計Click rate同EBITDA，概念虛無飄渺，結果熱潮過後，沒有多少家「科網股」能真正藉持續發展科網業務而壯大。

新舊經濟成功結合

到咗今時今日，全球（包括如內地等新興市場）消費者應用智能電子消費品已日趨普及，通訊傳輸基礎建設水平大幅提升，經營電子商貿的客觀環境及條件俱備，最重要係有可觀的客戶群作為營商基礎，傳統經濟與新興經濟相結合，炒作不再是電訊、科網企業專美，家電商亦可以搞物流、做遊戲商，玩法甚多，故今年魚缸以「科網」主題的盛宴，仍十分值得投資者期待。

除咗科網股之外，昨日醫藥股亦係其中一個逆市走強的板塊，如金活醫藥（01110）急升22%，而石藥集團（01093）及四環醫藥（00460）收市分別錄得1.9%及4.6%的升幅。

有大手上板的上海醫藥（02607）跌近半成，有指阿里透過中信21世紀搞醫藥電商直銷業務，或會對如上藥等傳統藥品分銷商不利。惟目前內地醫藥市場可供發展的空間仍廣，而發展醫藥電商直銷業務涉及監管問題，依家就下定論，似乎係言之尚早。

資金尋求避險之所，見昨日金礦股亦有追捧，紫金（02899）同招金礦業（01818）都逆市高收。不過，去年金礦股業績肯定難睇，現價往績市盈率未能反映呢個因素，加上今年金價仍未見得具大幅上升的條件，意味行業前景仍不太樂觀，落場追貨宜提防上車容易落車難。

北泰小股東有揸拿

拉閘已五年的北泰（02339），終於結束停牌歲月，昨日復牌低位曾見0.69元，收報1.09元，較停牌前價格跌70%。雖然復牌唔見一大截，但相信小股東都會話，沽得幾多得幾多，總好過等於零！

唔少基金持有的博士蛙（01698），到依家都仲係停牌，冇聲冇氣，雖然多數經已撇咗帳，但班芬佬一提起呢隻股條氣都幾唔順。所以古勝話，唔單只係散戶，連芬佬都可以遇股不淑，反正輸的是投資者的錢。

無論大戶小戶也好，最重要係唔好將所有雞蛋放晒係同一個籃內，盡可能要分散風險，特別係投資民企股。

古勝