依家香港仲係食緊個人遊條水，周大福（01929）就好醒喇，整個「周大福迪士尼珠寶專區」，仲整咗個「巨型足金米奇」，實帶挈到啲生意啦，今回真係吸金喇。
足金米奇會擺喺周大福旗下尖沙咀iSQUARE分店內，絲絲尋日去「朝聖」，足金米奇高達90厘米，據周大福執董孫志強（Peter）講，呢隻米奇老鼠相當重磅，足足有280両。
雖然Peter話「足金米奇」係非賣品而無定價，但以尋日店內每両飾金牌價約1.32萬計，未計手工費都要369.6萬大元，所以「足金米奇」可以話係鎮店之寶。周大福早喺一一年都試過斥資千萬元，打造足金小熊維尼雕像，同樣係無價品，但也成功引來小熊維尼愛好者，要求有樣學樣訂隻返屋企，size當然細好多啦。
作為迪士尼大中華區嘅獨家珠寶特許授權商，周大福特別趕喺春節前重金炮製迪士尼珠寶專區，區內同時展出鑲有2,000粒鑽石嘅玻璃鞋，亦屬非賣品。但Peter透露，目前暫未考慮增加專區數目，需視乎各店舖面積而定。
余絲韻