絲絲講場：恒生總廚馬會獻技
絲絲食慣好嘢，其中一個最Like嘅場，就係恒生銀行總行，佢哋嘅佳餚美食數都數唔晒，秋冬至有嘅蛇羹，更係一絕。平日只為恒生尊貴客戶服務嘅恒生廚房，上星期破例派出恒生行政總廚陳錦成師傅，喺賽馬會沙田會所凱旋廳擔任客席廚師，為100名馬會會員炮製佳餚。
招牌菜「花膠五蛇羹」
今次菜式包括恒生博愛堂嘅招牌菜 「花膠五蛇羹」，湯底採用鮮雞、雲腿、赤肉等，配以滋補花膠烹製，聽個名都Feel到有幾名貴。其餘精彩美饌仲有「金盞玻璃蝦球」、「雲腿官燕釀竹笙」等，聽個名都流晒口水。
恒生同賽馬會合作多年，所以今次派出頂級大廚獻技，陳師傅之前喺國金軒擔任行政總廚，仲獲得法國美食協會專業廚師勳章同兩奪旅發局頒發嘅美食之最大賞至高榮譽金獎。
余絲韻