喺咁多個神級投資者當中，股神巴菲特可謂係華爾街其中一個老而彌堅嘅例子，年屆83歲都不言休！不過，為咗令廣大投資者安心，都係時候搵定接班人。雖然佢把口冇講，但近日佢提高咗兩位投資總監管理資產嘅份額，坊間於是咪估呢兩位，就係股神心目中嘅接班人囉！
呢兩位投資總監庫姆斯（Todd Combs）同韋施勒（Ted Weschler），本身都係投資界翹楚，分別42同52歲，普通投資者可能比較少聽到佢哋嘅名字，但佢哋嘅投資實力實在不容少覷。佢哋管理嘅資產已經連續兩年跑贏標普500指數，去年投資收益更高過巴菲特嘅投資添。
既然表現標青過標指，巴菲特今年調高咗兩人管理嘅資產份額，兩人分別管理嘅資產，分別由30億美元，加到70億美元，有錢之餘仲有埋權，因為佢哋將會廣泛參與公司業務，包括併購事項等。
雖然巴郡投資規模高達1,000億美元，兩人管理嘅資產佔比得一成多，但佢哋即將參與投資以外嘅業務，就反映巴菲特對佢哋嘅信任啦！
不過股神未有表明接班人身份，亦未有退休計劃，大家不妨觀察住兩位候選接班人嘅表現先！
余絲韻