《財富》雜誌一年一度的「美國100家最適宜工作公司」選舉，今年位列榜首的公司又係Google，已經連續三年攞冠軍，唔怪之得成日都話喺Google工作福利有幾好，睇嚟係真有其事，否則無理由咁多打工仔會仆到去打工！
絲絲收到風，Google喺過去12個月一共收到1,294,784份求職申請，即係話平均每月都有超過十萬人申請Google的職位。究竟Google有咩過人之處？
絲絲發覺，原來Google喺舊年股價升到1,000美元以上，作為Google嘅員工梗開心啦，因為個個員工都有公司股票嘛，單係呢個福利已夠吸引！
不過，除咗Google，其他上市公司都有好多對員工關懷備至的福利。就好似亞軍SAS軟件公司，總部有醫療中心，員工同屋企人要睇醫生就方便得多喇！至於設計軟件公司歐特克，每四年獎勵員工六個禮拜全薪休假，舊年已經有429個員工受惠。
另一間軟件公司Intuit每年就提供高達650美元健身獎勵，包括游泳課程、健身俱樂部會員卡等等。
所以絲絲話，如果間間公司都可以好似呢100家公司咁錫住員工，仲邊使怕請唔到人啦？
余絲韻