為咗搶佔物流市場，騰訊（00700）最近入股華南城（01668），但回顧一三年其實內地三大網企「BAT」已經不斷搞併購，估計佢哋今年會繼續四出搵獵物。
「BAT」係邊三間網企？咪就係大家熟悉嘅百度（Baidu）、阿里巴巴（Alibaba）同騰訊（Tencent）囉，「BAT」剛好係佢哋英文名縮寫！三大網企中，騰訊投資或收購嘅公司數目超過24間，數目最多，涉及逾10億美元！
據內地資料，騰訊舊年投資領域十分廣，由移動互聯網、遊戲商、到金融等都有參與。當中比較熟悉嘅有注資金山網絡同買入搜狗36.5%股權。
阿里就集中移動雲端相關投資，好似酷盤、蝦米音樂以至盛傳想買埋天天動聽添！至於「BAT」另一個成員百度，舊年最矚目咪係斥資19億美元買咗91無線囉！
騰訊上年更積極拓展金融業務，除咗同中國平安、阿里巴巴合資成立眾安在線，亦注資好買財富同人人貸，海外就投資過金融網站Watsi。
據悉，騰訊旗下購物網站易迅同蘇寧雲商正申請快遞業務經營許可，目前已進入審核公示階段，預期互聯網企業競爭白熱化，戰場將由線上轉移至線下。
隨住騰訊業務不斷膨脹，股價亦好似搭緊「白金升降機」咁屢創新高，現時市值已超過9,800億元。
彭博仲公布CEO馬化騰以資產淨值130億美元，成為中國新首富，壓倒舊年冠軍百度李彥宏，李彥宏今年個人資產125億美元，輸咗5億美元！
余絲韻