Market Insight：手遊股買貨唔使急

受食品價格回落之助，內地去年十二月CPI按年升2.5%，比預期的2.7%低。中港股市一廂情願衝一浸之後，無以為繼，恒指昨跌209點收報22,787點，國指率先跌破周初低位，收報10,152點跌177點，估計今年內地全年CPI大約2.6%，大行睇明年進一步去到3至3.3%。年初人行未必咁快放心地泵錢救市，惟有睇住半條人命的A股繼續沉淪，睇怕短期加埋IPO重啟的心理影響，滬綜指試一試2,000點關口一啲都出奇。

改變分成勢掀衝擊

到底馬雲透過由新開平台的阿里巴巴，去顛覆手遊市場利潤分成規則，到底對騰訊（00700）業績即時衝擊有幾大？大家得個估字，但由主站平台十蚊袋九蚊，變為實得一蚊落袋，如果騰訊要跟阿里巴巴玩法，姑勿論跟到足抑或跟少少，都肯定唔係好消息。

諗起上世紀，港視（01137）前身城電以殺價回撥服務單挑香港電訊，係就係賺唔番香港電訊每年流失數以十億計直撥長途電話收入，但有眼見，就咁將佢打殘。

古勝冇點你 2014/01/10

萬里長空

毫無疑問，今次阿里巴巴破格的分成條件，騰訊盈利能力及市值，應該唔多唔少有所流失，到底手遊股可以「繼承」到幾多好處，只能放長雙眼等睇戲。昨日IGG（08002）及博雅互動（00434）繼續炒到癲，再升29%及9%。

睇番兩隻股票兩日內累積升幅分別達67.5%及42.5%，市值去到134億及88億元（兩間公司一二年業績為虧損1,343萬美元及賺1.42億元人仔）。

當然，無幾多投機者會對佢盤數有興趣，只着眼前途無限的動人故事。古勝都認為呢類股票只能訂止蝕合埋眼衝入去至有機會贏大鑊，不過從投機角度，昨日IGG有1.84億股易手，等同去年十月所發新股總數3.76億的49%，易手率創上市新高，幾乎半間公司單日碌咗一轉，話大孖沙無趁機滲多少貨出街都無人信，要捧場都係等等先好。

度假物業尚未流行

話口未完，內房股靜靜起革命，正路股如合景泰富（01813）、融創中國（01918）、世茂房地產（00813）、華潤置地（01109）、龍湖（00960）、中國海外（00688）及富力（02777）升幅介乎2至5%。但有人快樂有人愁，舊年內房銷售熱爆，但依然有部分失落分子，好似雅居樂（03383）啱啱公布一三年全年銷售403.4億人仔，達唔到預期420億人仔的銷售目標，昨日股價中段以為無乜影響，升過2.7%去到8.25元，最後打回原形收8.03元無起跌。

目標訂得比較保守向來係華人企業特色，雅居樂居然失預算，關鍵主要係訂得太進取（目前交出22.3%年度售樓增長其實唔差），部分項目施工比預期遲外，大行認為年初期望極高的海南及雲南旅遊地產項目，未達到預期效果有關，似乎第二間度假物業的概念，在內地仲未係好成熟。

落後板塊伺機短炒

受上月多晶硅價格回升的消息刺激，昨日光伏股又再翻炒，龍頭股保利協鑫（03800）股價創52周新高2.9元，收報2.82元，升6.4%。論升幅最大的則有卡姆丹克（00712），收報1.68元，升12%，但與52周高位2.53元仍有一段距離。興業太陽能（00750）及陽光能源（00757）則同升3%。除此之外，昨日頁岩氣股亦有異動，其中華油能源（01251）及安東油服（03337）分別升8%及5%，宏華（00196）相對落後，僅升1.8%。

事實上，呢轉科網股炒得幾癲，即使預計阿里巴巴上市前板塊估值會繼續炒高，但短線點都要回回氣，炒家在高位分段獲利，轉投其他落後板塊短炒一轉的可能性存在。

論走勢，安東股價以大成交確認重上250日線，技術走勢有改善，短線反彈主要阻力在5.8至6元水平。

古勝