以「鬥地主」聞名嘅博雅（00434），舊年十一月招股上市，都威咗一段時間，直至福壽園（01448）同埋信達資產管理（01359）出現後，風頭先至分薄咗。
尋日博雅又做風頭躉喇，皆因《福布斯》中文版發布嘅「中國最具潛力中小企業榜」，中國上市潛力企業100強中，就由博雅奪冠，深圳上市嘅東旭光電、海思科位列二、三。
今年嘅榜單上，最明顯嘅分別，係互聯網與移動互聯網、軟件技術等行業處於上升態勢，傳統製造業嘅比重繼續下降，唔怪之得啲手遊股、網絡股炒到癲。就連另一個屬於非上市榜單入面，排頭位嘅愷英網絡，原來都係做社區遊戲起家，現在開始進入到手機遊戲開發嘅領域。
今次奪冠嘅博雅，招股時吸引到7.7萬人認購，560人更屬「頂頭槌」飛，凍資額868億元，一度成為一三年嘅最佳成績。緊隨其後招股嘅福壽園，同埋信達，好快就打破博雅嘅紀錄。博雅嘅暗盤價都唔錯，有三成升幅，點知翌日掛牌，高開低收，全日股價僅升13.8%，令好多人大跌眼鏡。
能夠入到福布斯潛力企業榜嘅選取標準，係年銷售額喺1,000萬元至10億元人民幣之間、主營業務喺中國內地嘅中小企業。
余絲韻