以分享相片「睇完即毀」出晒名嘅網站Snapchat，先前因為拒絕社交網站Facebook（fb）提出嘅30億美金收購，震動科技界，原來Snapchat嘅創辦人嫌Facebook出價太低，唔志在賺快錢咁話，咁有自信，究竟有咩「揸拿」先？
話說Snapchat嘅行政總裁兼創辦人之一施皮格爾（Evan Spiegel）接受外國媒體訪問，大談點解咁夠膽向fb說不。施皮格爾爆料，fb嘅創辦人朱克伯格早喺一二年就搵佢哋傾收購，仲話fb好快會出隻同Snapchat差唔多功能嘅app，正如施皮格爾話齋，朱仔咁樣即係大石砸死蟹啫！
不過，Snapchat冇畀朱仔嚇親，對收購提議耍手擰頭，fb果然出隻Poke同Snapchat周旋，點知好快玩完，仲搞到朱仔死死氣搵Snapchat再傾過。施皮格爾仲寸嘴咁話，咁樣佢哋更加肯定自己嘅優勢，仲話唔志在區區30億美金嘅快錢咁話。
其實有人計過，如果Snapchat肯賣嘅話，施皮格爾同佢嘅拍檔墨菲（Bobby Murphy）每人可以分到7.5億美金。咁就要睇吓Snapchat嘅將來發展，施皮格爾係咪真係咁有眼光啦！
余絲韻