絲絲講場：拳王范統最叻避重就輕
百利保（00617）首席營運總監范統（Ronald）能文能武，鍾意打拳嘅佢，最近又贏拳賽。右手傷患兼帶病，打贏咗個後生過佢成25年嘅對手，拎咗個泰拳獎盃。
今次個比賽係Ronald打開泰拳嘅拳館，同海峰環保教育基金合作搞嘅慈善泰拳拳賽，比賽由16位嚟自中環財金界嘅業餘拳手參加，以體重分級打8場，每場3回合，同Ronald對打嘅，係32歲嘅會計師。
技術擊倒少壯拳手
Ronald話拳怕少壯，所以賽前要勤練氣，結果搞到感冒未清，右手舊患就畀醫生勸告佢每場只可大約揮出3次右拳，所以Ronald大部分時間都出左拳，控場同賺點數，睇準機會先至出右拳。結果第2回合成功重拳擊中對手，第3回合一開場3秒就再被Ronald以發痛嘅右拳擊倒，十足拍戲咁。後生嘅會計師最後都爬起身捱到完場，但就輸晒點數。
仔女捧場實唔衰得
今年將會57歲嘅Ronald話，自從佢師傅冼國林睇中佢骨格精奇，拉佢學散打以來，至今一共贏咗3場正式賽事，包括大隻過佢嘅海關督察，同埋後生過佢嘅23歲青年。用嘅係與工作同一道理「避重就輕」加「將勤補拙」，趁狀態好，今年仲想打多兩場公開賽。
Ronald笑住同絲絲講仲有一個致勝秘密，係佢對仔女都到場觀賽，阿仔仲帶埋成班朋友仔嚟，壓力咪話唔大，所以真係「唔衰得」。
余絲韻