Market Insight：水泥股汰弱留強

睇見中港兩地股市指數認真唔開胃，人仔拆息落番晒一樣唔掂。滬綜指跌至去年八月低位2,029點先勉強見技術反彈，最後升得1點收2,047點。

「克強經濟學」對經濟增長放緩的容忍度，睇落去愈來愈高，加上今年內地逐步實現利率市場化，加上叫停長達一年半的IPO市場重啟，一句唔該被國際投資者作為中字派「長空萬里」的藉口，連大鱷索羅斯亦出口術，預言一四年環球經濟不明朗，他擔心來自中國而非歐洲。

芬佬吼實A股準新丁

到底IPO重啟有幾大影響？今年預計有超過300間A股公司排隊上市，單是一月份就有超過50間，粗略估計全年有5,000億至1萬億人仔被公仔紙吸走，等於每星期96億至192億人仔，都真係唔講得笑。但有迹象見到券商為省靚招牌，一月打頭陣的一批伸手黨質素普遍較佳，吸引到唔少基金換貨，估計同近期A股弱到離晒譜有關。

古勝冇點你2014/01/08

萬里長空

講番個市，昨日國指被兩隻內險及石油拖住後腿，仲要跌54點收報10,236點，尚幸恒指仲有非中資類股份撐場，表現好些少，大摩及花旗全面調升一四年澳門博彩收入預測，金沙（01928）及銀娛（00027）再創新高，貢獻指數46點，加埋滙控（00005）以及利豐（00494）有追落後炒家捧場，恒指收市升28點收報22,712點。

魚缸愈趨兩極化，幾倍PE國企無人吼，幾十倍PE博彩及中國新經濟概念股驚死買唔切，最弊短期睇唔到逆轉的催化劑，網絡、環保、新能源、醫藥股，或者部分保守投資者會覺得貴到開始要警惕，但現實世界無人有預知未來水晶球，否則個個都識得3.7元買騰訊（00700）坐到五百蚊發晒達！

由於股市高度集中在新經濟股，好難評論依家係泡沫邊個一階段，怕輸又更怕執輸，古勝認為，較合理做法係做好賺頭蝕尾心理準備，入市前訂好一成至一成半，一個可以承受損失的止蝕位，同佢死過，炒到成個故事無戲唱為止。

基本因素有所好轉

仲係放心唔落，恐怕只能在超賣實力股中搵博反彈機會。水泥股自上月初至今累積跌幅唔細，中國建材（03323）及海螺水泥（00914）兩隻領袖股輾轉由高位跌15及19%。事實上過去兩年，水泥股的投資氣氛麻麻，行業嚴重供過於求造成水泥價格疲弱，行業毛利率持續受壓，不過，隨着中央加大整頓中小型水泥企業，提高環保節能等的產業標準，低效益產能陸續被淘汰，以及保障房及城鎮化計劃，對水泥需求的正面推助力逐漸浮現，市場都估計幾隻水泥龍頭，今年毛利率會比一三年有所改善。

中建材過去幾年的擴張步伐過急，三年複合產能年增長近三成，遇上冷鋒，公司已調整策略，今年起以改善毛利率及資產負債表為先，今明兩年資本開支會由去年高峰260億人仔，回落至每年90億至100億人仔。

近期水泥價格有見底企穩迹象，估計春節後季節性需求回升，水泥價看漲。一四年PE得5倍，同內銀唔同，論基本因素，水泥股最壞時刻已過，有冇燒鵝味道見仁見智，但肯定係蔗渣價錢，近期一跌已經將去年十一月中升幅消化八成，諗得過。

今年4G手機市場將成為各智能手機製造商角力的主場，周一中國無線（02369）受今年目標出貨量相關的消息刺激，股價急升，昨日回吐。畢竟智能手機銷量增加，不等於企業利潤就會同步增加，特別是如今市場競爭白熱化，製造商毛利率受擠壓。

TCL通訊策略奏效

昨日收市後，TCL通訊（02618）宣布上月手機及其他產品總銷售量按年升五成，其中海外市場的手機及其他產品銷售量按年增幅更達到61%，內地銷量則按年下跌17%。內銷數量同比下跌不一定係壞事，反而外銷業務持續增長，顯示走出去分散風險的策略收效，可藉此分散市場風險，避免跟本土同業惡性競爭，相信今年其股價表現可繼續跑贏同類股。

古勝