尋日中證監喺官方微博接連發咗兩條訊息，迅即引起網民嘅熱烈回應，短短幾個鐘內已經錄得過千個回應。
但唔知當中係咪有部分網民反應過激，令到中證監微博管理員要刪除留言，引發網民貼上蠟燭圖案以示抗議，仲有網民建議中證監主席肖鋼，應該要頒番個最受委屈獎畀管理員添！
肖鋼尋日喺中小投資者保護工作會議上提出指導性原則，大意內容係要大家正確認識「同股同權」大原則，以及點樣從呢項大原則落實保護中小投資者嘅關係。
佢仲話，要徹底保護中小投資者，就需要全方面監管嚟達致，包括以中小投資者需求及權益保護為導向，全面梳理部門規章制度等。
不過，自從宣布新股重啟後，內地股市瀉完再瀉，尋日有網民留言話要保障小股東都要睇背景，認為中證監今次出手係為新股重啟護航，又抨擊中證監應少說話多做事，股市上升先係保護中小投資者。