絲絲講場：李細燕背靠大埔福地

而「大埔福星」又真係為佢帶來好運，最近仲拉埋頭馬，真係恭喜晒！

愛駒「大埔福星」跑出

李細燕話佢隻「大埔福星」，上一季仲係跑第尾，今季（去年九月）開鑼，愈跑愈好，跑過第四、跑過第三，到上月廿一號更跑出第一。佢話贏獎金都係其次，最緊要有機會拉頭馬，佢話真係好開心，要請人食飯！

好多行內人都知大埔係李細燕嘅「福地」，除咗股票行喺大埔外，佢連大埔區嘅社會慈善活動都積極參與。

積極參與地區慈善

好似佢拉頭馬當日，拉完就要匆匆趕番去大埔參加社區聖誕嘉年華活動，因此行內人都封佢為「大埔之光」。

佢除咗喺大埔起家外，原來佢由細到大都住大埔區，特別有感情，覺得大埔區風水好，又係安全城市，所以連愛駒名都要改做「大埔福星」，話希望啲人想起馬主係大埔人。

李細燕同大埔咁有緣，絲絲覺得以後大家諗起大埔，應該會諗起李細燕！

余絲韻