Market Insight：股仔當道繼續尋寶

近期A股弱勢有點撲朔迷離，尤其早前被指跌市元兇──水緊，一星期上海同業拆息，由早前高位8.84厘回落至4.63厘水平，理由已站不住腳。至於其他投資者琅琅上口原因，主要係利率市場化及年初IPO重啟，亦唔少近日才知道新事物，昨滬綜指確認跌穿去年十一月，三中全會《決定》曝光，A股抽升前的起步位2,078點，睇落形勢真係幾兇險。

美股同A股會點揀？

退後一步睇，滬綜指的高位為○七年6,124點，之後跌至美國海嘯拖累的低位1,664點，隨後美國QE加埋中央4萬億元人仔救市，將指數谷返去3,478點，仍只及指數高峰的56%。經過五年再浮再沉的日子，目前指數的平均市盈率9.3倍，貼實中國股市成立以來低位。但PE值幾高好主觀，以近日股市兩隻例子，惟唔少人認為57倍的騰訊控股（00700）吸引過5.5倍的中行（03988）。

古勝冇點你 2014/01/07

萬里長空

連升五年美股，定係連跌五年A股抵買，一般想法好多想話A股抵。股市投資，睇上市公司盈利增長潛力外，資金成本也是重要考慮因素，國債反映當地投資機會成本。過去一年，環球投資者預視美息回升及經濟復甦下，選擇棄債投股，造就美股的強勁升浪，十年期美債孳息由1.7厘升到近日3厘，約高於標普500指數平均1.89厘股息約1.11厘。

儘管滬綜指大積弱，平均股息由○七年低位0.5厘輾轉回升到2.99厘，不過息差仍比美股大。假如上市公司業績增長放緩而人行中性趨緊的貨幣供應取態不變，的確很難說服國債投資者在股市加注，由這角度看美股吸引力更勝A股，故料A股弱勢逆轉催化劑，好大機會是通脹大幅回落至使人行再行寬鬆政策，可惜短期未必見得到的樓價受控同物價回落。

講番個市，一直認為信馬雲好過信分析員，今浪網絡及手遊股，至少會炒到阿里巴巴招股前夕，近日禾雀亂飛局面唔叫人感到意外，雲遊控股（00484）與同期的博雅（00434）及IGG（08002）比較，有點拉牛上樹反而有點古怪，或者同散戶傳統上對大銀碼股無好感有關。

小米夠料直接招股

早排來港開售紅米手機，眨眼賣光的小米，老總雷軍早幾日放風，一三年實現銷售及手機出貨量大升1.5倍及1.6倍，去到316億人仔及1,870萬部，因為創辦人雷軍亦係金山軟件（03888）大股東，故金軟一直被視為小米上市的跳板。小米近年幾次融資估值，由一○年底僅2.5億美元，到去年八月已經100億美元膨脹40倍，開舖賣機，先蝕頭注賺聲勢的策略，看來雷先生志不在此，借金軟上市恐怕唔啱佢胃口，況且金軟本身軟件及網絡遊戲生意有聲有色，同小米一併上市亦見唔到太大協同效應。

以今明兩年金軟預測增長約23至25%，一四年PE28倍唔貴，上星期啱啱升穿去年十月高位23.3元，進入無阻力區，最驚反而係市場對小米期望愈來愈大，捧場客要有心理準備，一旦小米直接招股上市，金軟可能會有震盪。

物流概念睇實深國

重磅股冇運行，游資湧去炒新興產業股，除咗幾隻內地科網股熱炒外，靜咗好耐相關細價股亦博大霧炒一轉。上周異動的中信21世紀（00241），昨日股價再升42%，一係唔發市，發市當三年！另見醫藥股亦唔失色，聯康生物（00690）臨尾市發力，掃到上全日高位0.36元，收升26%。

要繼續發掘細價股，可以睇下隻深圳國際（00152），呢期物流股炒到開巷，但深國就未動身，昨日股價逆市升1%，走勢圖顯示股價正醞釀突破，若聚到人氣，爆發力不容小覷。

古勝