負責管理超過數萬個地產代理嘅地產代理監管局（地監局），喺尋日平安夜突然公布，只係做咗短短年多嘅行政總裁伍華強（Augustine），基於個人理由，已向該局辭職。並將於出年三月正式離職，今次都幾突然，但地監局冇交代佢嘅新去向。不過，絲絲相信，以Augustine對城市規劃嘅豐富經驗，有機會重投相關工作。
如果以離職日計，Augustine做咗地監局CEO只係短短一年零五個月，可以話係該局成立15年以來，任期最短嘅CEO。地監局主席陳韻雲就話，感謝Augustine過去一年多以來對該局作出嘅貢獻，並會盡快舉行招聘，期望盡快搵到合適人選出任新CEO一職。
Augustine做地監局CEO之前，服務政府逾30年，對地政規劃亦相當熟悉，之前做過規劃署助理署長，其後提早退休離開政府，去咗做中央政策組政府城市規劃師，再調任西九文化管理局做過首任項目總監，之後再執掌地監局CEO。
睇番過去幾位地監局CEO，首任CEO周陳文琬一做就做咗6年，而政務主任出身的陳佩珊同余呂杏茜，任期都有6年同2年10個月。
余絲韻