絲絲講場：Xmas狂歡騰訊電商CEO送貨
過咗「雙十一」，內地電商喺年尾前仲有一個銷售高峰，就係聖誕啦。雖然今次大家減價嘅火力比唔上「雙十一」，不過，講到噱頭就一啲都無少到。好似騰訊旗下嘅易迅網，就搞咗個「聖誕狂歡惠」，參與活動微博互動嘅消費者唔單止有機會成為幸運用戶，由騰訊電商CEO吳宵光等公司高層親自送貨上門，仲可以收到神秘大禮添。
管理層化身速遞員
尋日平安夜，騰訊電商一班管理層齊齊化身速遞員，喺上海同深圳幫手送貨，收到管理層送貨嘅用戶，仲有一隻好可愛嘅企鵝公仔做聖誕禮物。作為騰訊電商CEO，吳宵光喺送貨時一眼就畀人認到。佢話，尋日聽咗好多用戶嘅意見，當中有讚嘅，當然都唔少得畀人彈，佢承諾返去一定會檢討問題，力求做到最好。
網民籲馬化騰客串
其實，內地電商都好興出動高層親自送貨，京東喺今年六月就搞過一個「暴走618」嘅活動，搵咗多個品牌高層化身京東速遞員，當時連微軟大中華區副總裁張永利有份幫手送貨。對於今次易迅網出動班管理層送聖誕禮物，網友都係讚多過彈，仲有人喺易迅網微博留言，呼籲馬化騰都客串埋一份。
余絲韻
