阿里巴巴集團主席馬雲唔單止做生意叻，近排喺藝術領域牛刀小試，自創咗一幅「馬體墨寶」畫作擺上淘寶拍賣，竟然畀個香港人用接近243萬人仔（約310萬港元）買咗，呢個成交價令唔少真正嘅畫壇大師都自嘆不如。講起呢幅大作，其實相當之抽象，驟眼睇似個太極圖，不過都有網友話似蚊香同雞蛋餅。至於實情係畫咩？買家將有機會同馬雲喺杭州太極禪院見面，共同「探討書畫藝術」，到時可以再慢慢研究。
對於自己嘅墨寶賣出高價，馬雲話，其實喺個拍賣價去到六十幾萬嗰時，已經有朋友忍唔住打來鬧佢，話佢糟蹋咗「藝術」。啱啱升呢成為畫壇大師嘅馬雲話，自己以前去紐約博物館，見到啲畫，其實一樣都覺得人哋都係糟蹋緊藝術，所以話啲畫最重要唔在於你點畫，而在於你點賣；唔在於你賣，在於有無人鍾意同欣賞。
馬大師話，自己都非常好奇買咗佢幅畫作嘅知音人邊個，當然，最重要都係要多謝佢唔單欣賞佢幅畫，仲支持咗公益。根據淘寶解釋，今次馬雲幅畫賣咗二百四十幾萬人仔，可以幫到160個困境家庭嘅母親喺淘寶創業。
絲絲除咗對知音人嘅身份好奇之外，講到明唔會再畫第二幅嘅馬雲，下次會有咩創舉，唔知鍾意唱歌嘅佢下次會唔會出埋唱片呢？
余絲韻