愈來愈多上市公司爆煲，港交所（00388）審批新股時都嚴咗好多，無不「目及」到金睛火眼。不過，一些「大牌子」，可能有「質素保證」，上市審批速度「奇快」！江湖傳聞，上市後股價反應超理想嘅信達資產管理（01359），港交所上市委員會審批其上市聆訊時，只係用咗四分鐘！大家冇眼花，真係四分鐘，直頭快過「打針」，仲破埋最快紀錄添！
當然呢個係江湖傳聞，大家唔好太過認真，但有資深賓架同絲絲講，一啲大型國企，由於公司夠「食力」（實力），母公司背景又夠雄厚，保薦人又係來自信譽好嘅大行，加上前期工夫做到足，上市文件齊晒料，嗰啲上市聆訊的確可以「好快好快」， 「都諗唔到上市委員會可以有乜理由會唔通過！」不過，佢吔就乘機呻，一啲細公司或者細行嘅DEAL就「同人唔同命」了！言下之意，即係話港交所「大細超」？
不過，港交所過去都講咗唔知幾多次，佢哋冇偏幫大公司，也不是「只愛大唔愛小」，只要上市文件資料齊全，上市審批一視同仁！
余絲韻