絲絲講場：李錦湊仔湊出「三部曲」
依家啲家長好緊張仔女嘅心身發展，有啲變咗怪獸家長添，點樣至可以做個好爸爸、好媽媽，法興證券環球股票產品部董事李錦（Edmond）嘅教仔錦囊，你哋可以參考下。
李錦話自己係行動派，無論工作幾忙，都會抽時間陪佢哋，身教佢嘅兩位公子。近年仲不斷爭取單對單嘅機會，以增進彼此間關係。
Edmond同絲絲講，當佢兩個囝囝幾歲大時，已經帶佢哋去天光墟擺賣，幫助弱勢社群之餘，順道教佢哋理財。依家佢哋已經係15歲同13歲嘅男孩子，除咗一家四口嘅家庭活動之外，又會爭取一些同囝囝一對一嘅機會，如一齊食飯、行山、去旅行等。好似早前Edmond就同大仔去咗柬埔寨四日四夜踩單車，增進咗父子間嘅了解，亦觀察到兒子平日點樣待人接物。佢又計劃下年同細仔坐火車穿州過省，甚至橫跨歐亞，聽起嚟又係一次特色之旅。
擬寫第三本親子理財書
已出版過兩本親子理財書嘅Edmond，正計劃寫第三本親子理財書，湊成「三部曲」。第一本關於從小教起、第二本講從父母做起，第三本就會集中講兒童理財，希望與父母共勉，教育好下一代。
余絲韻