臨近聖誕，渣打香港行政總裁洪丕正（Benjamin）喺今年增闢嘅員工餐廳「zone.d」，同一眾傳媒歡聚暢談，仲一齊玩遊戲。不過，對阿Ben嚟講，係咪「遊戲」應該好值得商榷，因為遊戲節目係回答記者各類古靈精怪嘅提問，例如最難忘嘅聖誕活動咁。
可能去過太多地方，阿Ben諗咗好一陣之後，憶述十幾年前到歐洲滑雪嘅體驗。佢話當年到法國境內嘅阿爾卑斯山滑雪，景色優美不在話下，好有動畫「飄零燕」嘅味道，難得嘅係滑雪場嘅食物各有特色，連洋葱湯都有紅、黃、白三款，同美國各地一式一樣都係熱狗、漢堡包好唔同。
忙咗成年，阿Ben下星期起就會放大假休息吓。當然佢冇忘記為公司拚搏咗成年嘅渣打員工，尋日朝早佢同埋個人銀行業務主管禤惠儀（Mary），以及個人銀行一班管理層走訪大約十間分行，仲向客人及同事派發禮物，慶祝聖誕佳節。