絲絲講場：新股送禮尊貴鬥藝術
年尾新股趕尾班車，港交所（00388）交易大堂呢兩日零舍熱鬧，尋日就有五隻新股一齊敲鑼，除咗人頭湧湧之外，絲絲仲見到幾間上市公司都送咗唔少特別嘅上市禮物畀港交所，好似鐵畫、人形雕像咁，而年度熱爆新股福壽園（01448）仲送咗個鼎添！
殯儀股福壽園個鼎原來意義非凡！公司話古代鼎係立國重器，時至今日則有顯赫、尊貴嘅意思，係和平、昌盛嘅吉祥物，鼎身仲刻有「福」字。所以大家唔好諗錯隔籬，個鼎同殯葬係無關o架！
雕塑擺設鐵畫樣樣齊
另一新股嘉里物流（00636）就以制服取勝，主席楊榮文着埋公司Jacket出席上市儀式，大賣廣告！同時公司送咗一個拎住速遞包裹嘅速遞員模型公仔畀港交所，不過詭異嘅係個公仔只有半個身，放喺張枱到就好似魔術「刀鋸美人」咁，遠睇都有啲驚嚇！
環亞智富（01390）就從日本帶嚟一個能樂表演者嘅雕塑，絲絲聽聞作品係由日本著名雕塑家以乾漆創作，作品中嘅表演者着住闊袍大袖衣飾，將能樂者嘅功架表現得活靈活現！能樂係日本獨有嘅舞台藝術，表演者會戴住各式面具演出歌舞劇。而康臣葯業（01681） 同海螺創業（00586）就分別送咗一座琉璃球同一幅提上「馬到成功」嘅鐵畫。
唔知係咪為咗方便嘉賓影到張靚相，港交所尋日特地搬出兩個大銅鑼，等五間公司主席唔使逼埋一堆，齊齊皆大歡喜！